Қазақстандық спортшы Ислам ойындарында құрамаға 12-ші алтын медаль әкелді
Қазақстан ұлттық құрамасының джиу-джитсу бойынша өкілі Мариан Журавлева Эр-Риядта өтіп жатқан Ислам ынтымақтастығы ойындарында чемпион атанып, ел қоржынына 12-ші алтынды салды, деп хабарлайды dailykz тілшісі.
Жарыстың кезекті күні Журавлева медаль үшін күрес кезеңіне жол ашты. Сауд Арабиясының астанасында өтіп жатқан дүбірлі додада ол 70 келіге дейінгі салмақ дәрежесінде бақ сынады. Бұл санатта турнир айналмалы жүйе бойынша ұйымдастырылған болатын.
Қазақстандық спортшы үш кездесуінің бәрінде жеңіске жетті. Ол марокколық Ясмин Арбибті, палестиналық Дания Убайдты және ирандық Хасти Хаммудиді сенімді түрде ұтып, топ жарды.
Қазіргі таңда Қазақстан құрамасының қоржынында 44 медаль бар:
— 12 алтын,
— 15 күміс,
— 17 қола.
Жалпыкомандалық есепте ұлттық құрама жетінші орынға жайғасқан.
Осылайша, Журавлева жеңісі Қазақстанның Ислам ойындарындағы алтын санын арттырып, ұлттық құраманың табысты көрсеткішін бекемдей түсті.
