Атырау облысында полиция ғимаратын салу әрекеті ауыл әкімі қызметінен босатылуына әкелді
Атырау облысында «жасыл белдеуге» құрылыс жүргізу талпынысы Махамбет ауылдық округінің әкімін қызметінен босатумен аяқталды. Бұл туралы облыстық прокуратура мәлімдеді, деп хабарлайды dailykz.
Ведомствоның ресми сайтында жарияланған ақпаратқа сәйкес, Махамбет ауданының прокуратурасы полиция бөліміне арналған жаңа ғимарат салу жоспарланған парк аймағын қорғауға шыққан. Аталған аумақта құрылыс жүргізу экологиялық талаптарға және қолданыстағы заңнамаға қайшы келген.
Заң мен бас жоспар ескерілмеген
Прокуратура мәліметінше, бұл құрылыс үшін Махамбет ауылдық округінің әкімдігі 2 гектар аумақтағы жасыл желекті кесуге дайын болған.
«Әкімдік заң талаптары мен елді мекеннің бас жоспарын елемей, экожүйеге айтарлықтай зиян келтіруі мүмкін әрекеттерге барған», – делінген Атырау облысының прокуратурасы таратқан хабарламада.
Әкім шешімдері жойылды, экожүйе сақталды
Прокурорлық қадағалау актісінің негізінде ауыл әкімінің қабылдаған шешімдері күшін жойды. Нәтижесінде өңірдің табиғи экожүйесін сақтау қамтамасыз етілді.
Жауаптылар тәртіптік жауапкершілікке тартылды
Аталған заңбұзушылықтар үшін:
- аудан әкімінің орынбасары,
- жер қатынастары және құрылыс бөлімдерінің басшылары,
- «Азаматтарға арналған үкімет» мемлекеттік корпорациясы» КЕАҚ-тың Махамбет филиалының басшысы
тәртіптік жауапкершілікке тартылды.
Ал Махамбет ауылдық округінің әкімі атқарып отырған қызметінен босатылды.
