Бублик, Анарбеков және Рыбакина: 2025 жылы Қазақстанның ең үздік спортшылары кімдер болды
2025 жыл қазақстандық спорт жанкүйерлерінің есінде ерекше жетістіктерімен қалды. Бұл жыл әлем чемпионаттарындағы тарихи медальдармен, футбол мен теннистегі серпінді маусыммен, сондай-ақ мұз айдындары мен бокс рингіндегі жарқын жеңістермен есте қалды. dailykz 2025 жылдың қорытындысы бойынша Қазақстанның ең үздік спортшыларын назарларыңызға ұсынады.
Темірлан Анарбеков — «Қайрат» ФК қақпашысы
2025 жылғы ең жарқын спортшылар тізімін Қазақстан ұлттық құрамасы мен алматылық «Қайраттың» қақпашысы Темірлан Анарбеков бастап тұр. Маусымды негізгі құрамнан тыс бастаған голкипер жыл ішінде командасының Чемпиондар лигасының жалпы кезеңіне тарихи жолдама алуына шешуші үлес қосты.
Ол ұлттық құрама сапында дебют жасап, «Қайраттағы» негізгі қақпашы орны үшін Александр Заруцкиймен бәсекеде жеңіске жетті. Командасымен қатарынан екінші рет КПЛ чемпионы атанды, Чемпиондар лигасы іріктеуінде бірнеше маңызды пенальти қайтарды және Еуропаның басты турнирінде матчтың үздік ойыншысы деп танылды.
Дастан Сатпаев — «Қайрат» ФК шабуылшысы
Алматылық «Қайраттың» тағы бір жарқын жұлдызы — 17 жастағы Дастан Сатпаев. Ол қысқа уақыт ішінде академия түлегінен клуб пен ұлттық құраманың көшбасшыларының біріне айналды.
2025 жылы Сатпаев Чемпиондар лигасында мадридтік «Реалға» қарсы ойында өзін сенімді көрсетті, «Копенгаген» қақпасына гол соғып, Қазақстан тарихында басты еурокубоктың негізгі кезеңінде гол соққан алғашқы ойыншы атанды. Сондай-ақ ол 2026 жылғы әлем чемпионатына іріктеу барысында Бельгия құрамасының қақпасына гол соғып, сенсациялық тең нәтижеге үлес қосты. Дастан ұлттық құрама тарихындағы ең жас гол авторы болды. Келесі маусымда ол лондондық «Челси» клубына ауысады.
Евгений Кошкин — конькимен жүгіруші
Қазақстан құрамасының өкілі Евгений Кошкин мансабындағы ең сәтті маусымын өткізді. Ол Харбинде өткен Азия ойындарында 100 метр қашықтықта күміс жүлде иеленді. Сонымен қатар 500 метр қашықтықта Әлем кубогы кезеңдерінде бірнеше рет жеңімпаз және жүлдегер атанды.
Астанада өткен Спартакиадада Кошкин 100 метрде әлем рекордын жаңартты (9,31 секунд). Мамандардың пікірінше, ол келесі жылы Олимпиада медаліне басты үміткерлердің бірі болмақ.
Денис Никиша — шорт-трекші
Шорт-трек бойынша Қазақстан құрамасының көшбасшысы Денис Никиша 2025 жылы әлем чемпионатындағы тарихи жетістігін бекітіп, 500 метрде екінші күміс медаль жеңіп алды. Азия ойындарында микст эстафетада қола, ерлер эстафетасында алтын медаль иеленді. Ол 2026 жылғы Олимпиада ойындарына қатысатын ұлттық құраманың мүшесі атанды.
Михаил Шайдоров — мәнерлеп сырғанаушы
Қазақстанның ерлер арасындағы ең үздік мәнерлеп сырғанаушысы Михаил Шайдоров жылды Азия ойындарының қола жүлдесімен бастап, Төрт құрлық чемпионатында жеңіске жетті. Маусымның басты жетістігі — әлем чемпионатының күміс медалі. Ол Қазақстан тарихындағы әлем біріншілігінде жүлде алған үшінші спортшы атанды және Олимпиада-2026 жолдамасын жеңіп алды.
Жаңа маусымда Шайдоров Гран-при сериясында екі рет жүлдеге ілініп (күміс және қола), финалға қатарынан екінші жыл жолдама алды.
Софья Самоделкина — мәнерлеп сырғанаушы
Қазақстан атынан өнер көрсетіп жүрген Софья Самоделкина 2025 жылды өте табысты өткізді. Ол әйелдер арасындағы жалғыз сырғанауда Гран-при тарихындағы Қазақстанның алғашқы медалін (күміс) алып келді. Сонымен қатар «Челленджер» сериясы мен халықаралық турнирлерде бірнеше жүлде жеңіп алды. Әлем чемпионатында Олимпиада нормативін орындап, 2026 жылғы ойындарға қатысу құқығына ие болды.
Александр Бублик — теннисші
Қазақстанның бірінші ракеткасы Александр Бублик мансабындағы ең үздік маусымын өткізді. Ол қатарынан екі топырақтағы ATP 250 турнирін жеңіп алып, «Ролан Гаррос» турнирінің ширек финалына шықты. Париждегі «Мастерсте» жартылай финалға жетіп, Гуанчжоуда ATP 250 хард турнирінде жеңіске жетті.
Сонымен қатар Бублик Галледегі ATP 500 турнирін екінші рет ұтып алды. Маусымды ол әлемдік рейтингтегі рекордтық 11-орынмен аяқтады.
Елена Рыбакина — теннисші
Қазақстанның үздік теннисшісі Елена Рыбакина 2025 жылды керемет аяқтады. Ол алғаш рет WTA Қорытынды турнирінде жеңіске жетіп, финалда әлемнің бірінші ракеткасы Арина Соболенконы жеңді. Осылайша Рыбакина бұл турнирде чемпион атанған алғашқы қазақстандық болды.
Маусым барысында ол Страсбург пен Нинбода өткен WTA 500 турнирлерінде де топ жарды. Жылды әлемдік рейтингтің 5-орнында қорытындылады.
Торехан Сабырхан — боксшы
19 жастағы қазақстандық боксшы Торехан Сабырхан 2025 жылы нағыз серпіліс жасады. Ол World Boxing ұйымы аясында өткен ересектер арасындағы әлем чемпионатында алтын медаль жеңіп алды. Бұл оның әлем біріншілігіндегі алғашқы қатысуы еді.
Марапаттау рәсіміне Қазақстан ҰОК президенті әрі World Boxing басшысы Геннадий Головкиннің қатысуы символдық мәнге ие болды. Сонымен қатар Торехан мен оның ағасы Махмуд биыл кәсіпқой рингте дебют жасап, жарқын жеңіске жетті.
Бублик, Анарбеков және Рыбакина бастаған 2025 жылғы Қазақстанның үздік спортшылары ел спортының дамып келе жатқанын және халықаралық аренада бәсекеге қабілетті екенін тағы бір мәрте дәлелдеді.
