Джон Джонс UFC-ке ренжіді: Ақ үйдегі турнирге байланысты келісімшартты бұзуды сұрады
UFC аңызы Джон Джонс ұйым басшылығына ашық наразылық білдіріп, егер промоушен оны Ақ үйде өтетін турнирге лайық деп санамаса, келісімшартты бірден тоқтатуды сұрады. Бұл туралы dailykz хабарлады.
Джонс UFC ұсынысына көңілі толмағанын айтты
Ақ үйде өтетін тарихи турнирдің толық жекпе-жек тізімі жарияланғаннан кейін Джон Джонс әлеуметтік желідегі Х парақшасында мәлімдеме жасады. Ол UFC президенті Дана Уайт айтқан пікірлерге жауап беріп, ұйыммен келіссөз жүргізгенін растады.
Спортшының айтуынша, ол бұл жекпе-жекке қатысу мәселесін командасымен бірге UFC-пен талқылаған және бастапқы талаптарының бір бөлігінен де бас тартқан. Алайда оның сөзінше, ұсынылған қаржылық шарттар өте төмен болған.
Сізде шағым бар ма? Бізге жазыңыз
«Мен және менің командам бұл жекпе-жек туралы UFC-пен шынымен келіссөз жүргіздік. Тіпті бастапқы талаптарымның бір бөлігін жеңілдеттім. Бірақ оның орнына не алдым? Маған өте аз ұсыныс жасалды. Иә, жамбасымда артрит бар, бұл ауыртады. Бірақ бұл менің жекпе-жекке шыға алмайтынымды білдірмейді. Егер мен осы төмен ұсынысты қабылдасам, онда жамбасым бірден жазылып кетіп, Ақ үйдегі кардқа кірер ме едім? Бұл қисынсыз», – деп жазды Джонс.
Спортшы ем қабылдап, жекпе-жекке дайын болғанын айтты
Джонс қажетті ем-шаралардан өткенін және Ақ үйдегі турнирге дайындық лагерін бастауға ниетті болғанын айтты. Сондай-ақ ол UFC басшысы Дана Уайтты шындыққа жанаспайтын мәлімдеме жасады деп айыптады.
«Кейде келісімдер бұзылып жатады, мұны түсінемін. Бірақ көпшілік алдында шындыққа жанаспайтын нәрсе айту дұрыс емес», – деді ол.
Джонс UFC-тен қатты көңілі қалғанын жеткізді
Екі салмақ дәрежесінде бұрын чемпион атанған Джонс ұйымға көп жыл қызмет еткенін еске алып, қазіргі жағдайдың өзіне ауыр тигенін жасырмады.
«Мен UFC үшін қаншама жыл бойы еңбек еттім. Ал қазір “ол әлсіреп қалды” деген сөздерді есту өте өкінішті. Оның үстіне жұма күні ғана UFC өкілдері хабарласып, мені Ақ үйдегі турнирге әлдеқайда төмен гонорармен шығуға көндірмек болды. Егер UFC шынымен мені енді жарамсыз деп есептесе, онда бүгін-ақ келісімшартымды тоқтатуды сұраймын. Ешқандай айла-тәсілсіз, ойынсыз», – деп жазды Джон Джонс.
Ақ үйдегі турнирдің басты жекпе-жектері жарияланды
Айта кетейік, бұған дейін UFC Ақ үйде өтетін тарихи турнирдің негізгі жекпе-жектерін жариялаған еді. Кештің басты кездесуінде грузиялық файтер Илия Топурия мен америкалық Джастин Гэтжи кездеседі. Екеуі де жеңіл салмақтағы тұрақты және уақытша чемпиондар ретінде белгілі.
Ал кештің екінші басты жекпе-жегінде ауыр салмақта уақытша чемпиондық белбеу үшін француз файтері Сирил Ган мен бразилиялық жекпе-жек шебері Алекс Перейра октагонда жолығады. Перейра бұл кездесуге дейін тағы бір салмақ дәрежесіне ауысып, үшінші чемпиондық белбеуді иеленуге талпынып отыр.
Джонс бұрын мансабын аяқтағанын жариялаған
Айта кету керек, Джон Джонс бұған дейін мансабын аяқтағанын мәлімдеген болатын. 2025 жылдың маусым айында оның ресми түрде спорттан кететінін жариялағаны хабарланған. Алайда соңғы жағдай UFC-пен қарым-қатынастың әлі де күрделі екенін көрсетіп отыр.
