Еуропа чемпионы биатлоншы Сиверт Баккен Италиядағы қонақүйден өлі табылды
Италияның Лавазе қаласындағы қонақүй нөмірінен норвегиялық биатлоншы, үш дүркін Еуропа чемпионы Сиверт Баккеннің мәйіті табылды. Бұл туралы MetaRatings порталына сілтеме жасап dailykz хабарлады.
Спортшы небәрі 27 жаста болған. Қайтыс болу себебі әзірге ресми түрде жарияланған жоқ.
Оқиғаға байланысты Норвегия биатлоншылар одағы ресми мәлімдеме жасады.
«Ең алдымен, Сиверттің отбасы мен жақындарына көңіл айтамыз. Қазіргі таңда Италия билігімен тығыз байланыстамыз, тергеу жүргізілуде. Команда мүшелерінен осы ауыр кезеңде сабыр сақтауды сұраймыз», – делінген хабарламада.
БАҚ-та бұған дейін спортшының жүрек саулығына қатысты мәселелер болуы мүмкін деген ақпарат тараған. Алайда бұл деректерге әзірге ресми растау берілген жоқ.
Сиверт Баккен өз буынының ең дарынды биатлоншыларының бірі саналды. Ол Еуропа чемпионатында үш рет алтын медаль жеңіп алып, Норвегия құрамасының негізгі құрамында орнықты. Мансабындағы ең үлкен жетістігі – 2021/22 маусымында Эстерсундтағы Әлем кубогы кезеңінде жеңіске жетуі.
Ағымдағы маусымда Эстерсундта өткен Әлем кубогының алғашқы кезеңінде ол жекелей жарыста төртінші орын алды. Спринтте нысаналарды мүлт жібермей, жетінші нәтиже көрсетсе, қуу жарысында тоғызыншы болып мәреге жетті.
Хохфильцендегі екінші кезеңді өткізіп алған спортшы кейін Анси кезеңінде қайта жарысқа қосылды. Қайтыс болардан екі күн бұрын Францияда өткен масс-стартта 20-орын алған болатын.
Әлем кубогының үш кезеңінен кейін Сиверт Баккен жалпы есепте 13-орында тұрды және маусымдағы үздік бес норвегиялық спортшының қатарына кірген еді.
Еуропа чемпионы биатлоншы Сиверт Баккеннің қазасы спорт әлемі үшін ауыр қайғы болды.
