Флойд Мейвезер мен Мэнни Пакьяо арасындағы реванштың күні жарияланды
Бокс аңыздары — америкалық Флойд Мейвезер мен филиппиндік Мэнни Пакьяо арасындағы көптен күткен реванш жекпе-жегі 19 қыркүйекте Лас-Вегаста өтеді. Бұл туралы dailykz The Ring басылымына сілтеме жасап хабарлайды.
Басылым мәліметінше, жекпе-жек ресми түрде Netflix арқылы жарияланған.
Батыс ақпарат құралдары өткен жылдың күзінен бастап Мейвезер мен Пакьяо командалары реванш жөнінде келіссөздер жүргізіп жатқанын жазған еді. Ал өткен аптада 49 жасқа толған Флойд Мейвезер кәсіби боксқа қайта оралатынын мәлімдеді.
Сізде шағым бар ма? Бізге жазыңыз
«Мен Мэннимен бір рет айқастым және оны жеңдім. Бұл жолы да нәтиже дәл сондай болады», — деді Мейвезер Netflix анонсында.
Мэнни Пакьяо рингке 19 шілдеде Лас-Вегаста оралды. Ол жартылай орта салмақтағы WBC чемпионы атағы үшін Марио Барриосқа қарсы шықты. 12 раундқа созылған жекпе-жек көпшілік төрешілер шешімімен тең аяқталды.
47 жастағы Пакьяо сондай-ақ 18 сәуірде Лас-Вегаста Руслан Проводниковқа қарсы көрсетілімдік жекпе-жек өткізеді.
«Флойд екеуіміз әлемге бокстың ең ұлы айқастарының бірін сыйладық. Жанкүйерлер бұл реваншты ұзақ күтті — олар соған лайық. Бұл жолы жекпе-жек одан да ауқымды болады, себебі ол Netflix арқылы бүкіл әлемге тікелей эфирде көрсетіледі.
Мен Флойдтың кәсіби мансабындағы жалғыз жеңілісін мәңгі есте сақтауын қалаймын. Бұл жекпе-жекті бүкіл әлемдегі филиппиндік отандастарыма және Филиппинді ұлықтауға арнаймын», — деді Пакьяо.
Айта кетейік, Мейвезер мен Пакьяо арасындағы реванш олардың алғашқы кездескенінен 11 жылдан астам уақыт өткен соң өтпек. Алғашқы айқас бокс тарихындағы ең табысты жекпе-жек ретінде қалды — жалпы табыс 600 миллион доллардан асты. Жартылай орта салмақтағы титул үшін өткен сол кездегі кездесу 4,4 миллион ақылы трансляция жинап, кассалық түсімі 72 миллион доллардан асқан.
Флойд Мейвезер мен Мэнни Пакьяо арасындағы реванш — бокс әлеміндегі ең көп күтілетін оқиғалардың бірі болып отыр.
