Манчестер Юнайтед жаңа бас бапкерін ресми түрде таныстырды
Англияның әйгілі клубы «Манчестер Юнайтед» жаңа бас бапкерін таныстырды. 44 жастағы ағылшын маманы Майкл Кэррик команданың тізгінін ресми түрде қолына алды. Бұл туралы клубтың ресми мәлімдемесіне сілтеме жасаған dailykz хабарлайды.
Аморимнің орнына – Кэррик
Майкл Кэррик бас бапкер қызметінде португалиялық Рубен Аморимді алмастырды. Аморимнің отставкасы 5 қаңтарда жарияланған еді. Сол уақыттан бері команданы уақытша шотландиялық Даррен Флетчер басқарды. Ол алдағы уақытта клубтың жасөспірімдер командасында (U18) жұмысын жалғастырады.
Келісімшарт және соңғы клубы
Кэррикпен келісімшарт 2025/26 маусымының соңына дейін жасалды. Оның соңғы жұмыс орны – «Миддлсбро» клубы. 2024/25 маусымында команда Чемпионшипте (Англияның екінші дивизионы) оныншы орынмен шектеліп, маусым соңында Кэррик қызметінен босатылған болатын.
«Юнайтедпен» байланысы терең
Майкл Кэррик бұған дейін, 2018 және 2021 жылдары, «Манчестер Юнайтедтің» уақытша бас бапкері міндетін атқарған. Футболшы ретіндегі мансабының басым бөлігін де манкуниандықтар сапында өткізгені жанкүйерлерге жақсы таныс.
Кэрриктің алғашқы пікірі
«Манчестер Юнайтедті басқару – мен үшін үлкен мәртебе. Бұл клубта табысқа жету үшін не қажет екенін жақсы білемін. Қазір басты мақсатым – ойыншыларға осы клубқа лайық жоғары стандарттарға жетуге көмектесу. Бұл құрамның оған толық мүмкіндігі бар екеніне сенімдімін», – деді Кэррик тағайындалғаннан кейін.
Оның айтуынша, ол командадағы бірқатар ойыншылармен бұрыннан таныс әрі соңғы жылдары клубтың дамуын жіті бақылап жүрген.
Жаттықтырушылар штабы
Жаңа бас бапкерге Стив Холланд, Джонатан Вудгейт, Тревис Биннион, Джонни Эванс және Крейг Моусон көмектесетін болады.
Турнирлік жағдай
Англия Премьер-лигасының 21 турында «Манчестер Юнайтед» 32 ұпай жинап, турнир кестесінде жетінші орында тұр.
