Неймар операция жасатты.

Танымал бразилиялық футболшы Неймар қайтадан ауруханаға түсті — спортшыға хирургиялық операция жасалды. Бұл туралы «Сантос» клубына сілтеме жасап dailykz хабарлайды.

Мәліметке сәйкес, 22 желтоқсанда Неймарға артроскопия процедурасы жасалған. Операция сәтті өткен. Бұған дейін футболшы сол аяғының менискін жарақаттап алған.

— Операция ойдағыдай өтті, спортшы өзін жақсы сезініп жатыр, — делінген клубтың ресми хабарламасында.

Клуб өкілдерінің айтуынша, жақын арада шабуылшы физиотерапевтің бақылауымен қалпына келу курсынан өте бастайды.

Еске сала кетейік, биылғы қаңтар айында Неймар Сауд Арабиясының «Аль-Хиляль» клубымен келісімшартын бұзғаннан кейін туған клубы «Сантосқа» қайта оралған болатын. Бразилиялық футболшы — осы клубтың түлегі. Ол кәсіби деңгейде 2009–2013 жылдар аралығында «Сантостың» намысын қорғады.