Қазақстан құрамасының бұрынғы футболшысы Марат Есмуратов өмірден өтті
Қазақстан құрамасының бұрынғы футболшысы Марат Есмуратов 65 жасында дүниеден өтті. Ардагер спортшының қайтыс болғаны туралы ақпаратты Қазақстан футбол федерациясы растады, деп хабарлайды dailykz.
ҚФФ марқұмның отбасы мен жақындарына, сондай-ақ бүкіл футбол қауымдастығына көңіл айтты.
«Қазақстан футбол федерациясы ел футболының дамуына үлес қосқан Марат Жалғасұлының есімін әрдайым құрметтейді. Оның жарқын бейнесі футбол тарихында мәңгі сақталады», – делінген ресми хабарламада.
Марат Есмуратов кәсіби мансабында Қазақстан ұлттық құрамасының сапында жеті рет алаңға шықты. Сонымен қатар отандық бірнеше клубта, оның ішінде «Қайрат» командасында өнер көрсетті. Футболшы ретіндегі мансабын аяқтаған соң, жаттықтырушы ретінде жұмысын жалғастырды.
МИА «Қазинформ» мәліметінше, Марат Есмуратовтың қайтыс болуына жүрек талмасы себеп болған.
Қазақстан құрамасының бұрынғы футболшысы Марат Есмуратовтың есімі отандық футбол тарихында мәңгі қалады.
