Қазақстандықтар Таяу Шығыстағы қақтығыс аймағында – СІМ хабарламасы
Таяу Шығыстағы қақтығыстың ушығуы аясында Қазақстан азаматтарының бір бөлігі қауіпті аймақта қалып отыр. Осыған байланысты Қазақстан Республикасының Сыртқы істер министрлігі ресми мәлімдеме жасады. Бұл туралы dailykz хабарлайды.
Ведомствоның мәліметінше, Таяу Шығыс елдеріндегі Қазақстанның шетелдік мекемелері күшейтілген жұмыс режиміне көшірілді. Елшіліктер мен консулдықтарда отандастарға қажетті консулдық-құқықтық көмек көрсетілуде.
Қазақстандықтардың орналасуы
Министрліктің хабарлауынша, өңірде жүрген азаматтардың тізімдері жаңартылуда. Бұған әуежайлар мен транзиттік аймақтарда жүрген қазақстандықтар да кіреді. Азаматтар үшін мессенджерлерде жедел чаттар ашылып, сол арқылы елдегі жағдай, қауіпсіздік бойынша ұсынымдар мен өзге де маңызды ақпарат берілуде.
Сізде шағым бар ма? Бізге жазыңыз
Сонымен қатар, СІМ мен шетелдегі мекемелерде жедел байланыс желілері іске қосылған. Қақтығыс ушығып тұрған аймақтағы қазақстандықтардың нақты саны анықталып жатыр, алайда транзиттік аймақтардағы азаматтарды есепке алу қиындық тудыратыны атап өтілді.
Қазақстанның дипломатиялық өкілдіктері туристік компаниялармен бірлесіп, әуежайлар мен транзиттік аймақтарда қалған азаматтарды уақытша орналастыру мәселесіне де қолдау көрсетіп жатыр.
Ведомство өкілдерінің айтуынша, қазақстандықтарды қауіпті аймақтардан эвакуациялау үшін ықтимал бағыттар мен шаралар пысықталуда. Қосымша ақпарат СІМ мен шетелдік мекемелердің ресми ресурстарында, сондай-ақ Kaspi Travel қосымшасы арқылы таратылатын болады.
Сыртқы істер министрлігі қазақстандықтарды сабыр сақтауға, жергілікті билік талаптары мен ұсынымдарын орындауға, қауіп деңгейі жоғары аймақтардан аулақ болуға және енгізілген шектеулерге түсіністікпен қарауға шақырды.
Қазіргі таңда Қазақстан азаматтары арасында зардап шеккендер туралы ақпарат түскен жоқ. Жаңа мәліметтер болған жағдайда ресми арналар арқылы қосымша хабарланатыны айтылды.
Айта кетейік, бұған дейін Қазақстанның **Біріккен Араб Әмірліктері**ндағы елшілігі Таяу Шығыстағы жағдайға байланысты отандастарды бір-біріне қолдау көрсетуге шақырған болатын. Сондай-ақ азаматтарға құрлық арқылы эвакуациялануға дайын болу жөнінде ескерту жасалды.
