Қазақстанның футболдан әйелдер құрамасының капитаны ресейлік ЦСКА клубынан кеткенін ресми түрде жариялады
Қазақстанның әйелдер құрамасының капитаны Юлия Мясникова өзінің Instagram парақшасында Ресейдің танымал ЦСКА клубынан кеткенін хабарлады. Бұл туралы dailykz жазды.
Юлия Мясникова өз постында Мәскеудің ЦСКА клубында өткізген жеті жылдық мансабының аяқталғанын атап өтті. Қазіргі таңда оның кету себебі нақты айтылмаған, бірақ желтоқсан айының басында футболшы өткен жылы аяқ сүйегін сындырып, ота жасатқанын және енді пластина орнатылып, толық қалпына келу үшін уақыт қажет екенін түсіндірді.
«ЦСКА-ға маған көрсеткен сенімі үшін алғысымды білдіремін. Бұл менің кәсіби жолымда маңызды кезең болды — үлкен жауапкершілік пен нағыз командалық жұмыс. Әр күн сайын максималды күш салу мен дамуға ұмтылуға тура келді, ал осы тәжірибені мен өзіммен үлкен құрметпен және алғыс сезімімен алып кетемін», — деп жазды Мясникова.
Ол клубтың жанкүйерлеріне ерекше алғыс айтты. Қазақстандық ойыншының айтуынша, олардың қолдауы алаңда да, одан тыс жерде де сезілген. «Клубқа, штабқа, команда серіктестеріне және барша артында жұмыс істейтіндерге рахмет. Бұл мені ойыншы ретінде де, адам ретінде де мықты етті», — деп қорытындылады футболшы.
Қарағанды футболының түлегі Юлия Мясникова 2019 жылдан бері ЦСКА клубында өнер көрсетті. Осы уақыт ішінде ол екі рет Ресей чемпионы атанып, ел Кубогы мен Суперкубогын жеңіп алды. Бұған дейін ол Шымкенттің «БИИК-Казыгурт» клубында ойнап, алты рет Қазақстан чемпионатын жеңіп шыққан.
