Рубен Аморим «Манчестер Юнайтед» клубының бас бапкері қызметінен кетті
Португалиялық маман Рубен Аморим «Манчестер Юнайтед» клубының бас бапкері қызметінен босатылды. Бұл туралы ағылшын клубының ресми сайтына сілтеме жасап, dailykz хабарлайды.
40 жастағы бапкер «МЮ»-ды 2024 жылдың қарашасынан бастап басқарған. Қызметтен кетуінің нақты себептері жарияланған жоқ.
Клуб басшылығы бұл шешімді «өзгеріс жасауға дәл қазір ең қолайлы уақыт келді» деп түсіндірді. Ресми мәлімдемеде аталған қадам команданың Англия Премьер-лигасында барынша жоғары нәтиже көрсетуіне мүмкіндік береді деп көрсетілген. «Манчестер Юнайтед» өкілдері Аморимге клуб дамуына қосқан үлесі үшін алғыс айтып, болашақ мансабына сәттілік тіледі.
Команданың уақытша бас бапкері болып 41 жастағы Даррен Флетчер тағайындалды. Шотландиялық маман ойыншы ретіндегі мансабының басым бөлігін «МЮ»-да өткізген және кейін бірнеше жыл клуб академиясында жаттықтырушы болып жұмыс істеген.
Аморим қызметтен кеткен сәтте «Манчестер Юнайтед» АПЛ турнирлік кестесінде 31 ұпаймен алтыншы орында тұр. Команда Чемпиондар лигасы аймағын түйіндеп тұрған «Ливерпульден» үш ұпайға қалып келеді.
Рубен Аморимнің «Манчестер Юнайтед» клубынан кетуі команда үшін жаңа кезеңнің басталуына жол ашуы мүмкін.
