ШҚО әкімі тұрғындардың жаңа сағат белдеуі бойынша шағымдарына жауап берді
Шығыс Қазақстан облысының әкімі Нұрымбет Сақтағанов СЦК брифингінде өңір тұрғындарының қыс мезгілінде күннің ерте батуына қатысты шағымдарына жауап берді, деп хабарлайды dailykz.
Журналистер сағат белдеуі мәселесін қайта қарастыру жоспарланып жатыр ма және осы бағытта қандай шаралар қабылданғанын сұрады. Оған жауап ретінде Нұрымбет Сақтағанов өңір жаңа уақытқа бір жыл сегіз айдан бері бейімделіп кеткенін еске салды.
«Бұл мәселе мемлекет деңгейінде, тиісті мамандар мен ғалымдардың талдауы мен ұсыныстарын ескере отырып қарастырылды. Қазіргі таңда біз көптеген ұйымдар мен мекемелердің жұмыс кестесін қайта қарап шықтық: олар 8:00-ден 19:00-ге дейін жұмыс істейді, әлемнің әртүрлі қалаларында да әртүрлі кестелер қолданылады.
Бірақ сол елдерде мұндай мәселе туындамайды. Менің ойымша, біз бұл мәселені қайта қарамаймыз», – деді өңір басшысы.
Биыл наурызда ШҚО-ның барлық аудандары өздерінің жұмыс кестесіне – таңғы 8:00-ден 17:30-ға дейін көшкені хабарланған еді. Осылайша өңір жаңа сағат белдеуіне бейімделді.
Сондай-ақ Сауда және интеграция министрі Арман Шаккалиев сағат белдеуі өзгеруі мүмкін бе деген сұраққа жауап берді. Журналистер министрді ғалымдар біртұтас сағат белдеуіне көшу қазақстандықтарға кері әсер етеді десе, өз қатесін мойындауға дайын ба деп сұрады.
«Біз бірнеше рет мәлімдедік: шешім қабылданды. Ал оны қате деп айту – менің сөзім болмайды», – деді министр сол кезде.
