Токаев Жапонияда жұмыс істеп жатқан қазақстандықтармен кездесті
Қазақстан Президенті Қасым-Жомарт Тоқаевтың Токиоға ресми сапары аясында Жапонияда оқып жатқан немесе әртүрлі салаларда жұмыс істеп жүрген қазақстандық азаматтармен кездесуі өтті. Бұл туралы dailykz Ақордаға сілтеме жасап хабарлайды.
Кездесу барысында Мемлекет басшысы қазақстандықтарға Жапония сияқты дамыған елдердің тәжірибесін үйренудің маңыздылығын атап өтті.
“Бұл сапар біздің елдер арасындағы қарым-қатынасты жаңа серпінге бөлейді деп сенемін. Жапон тарапы да осы сапарға үлкен көңіл бөледі. Бүгін мен Премьер-министрмен кездесу өткізетін боламын. Шүбәсіз, біздің ынтымақтастығымыз үлкен перспективаларға ие болады.
Білгеніңіздей, Қазақстан дамудың жаңа кезеңіне аяқ басты. Биыл экономикамыздың өсу қарқыны 6%-дан асты, бұл өте жақсы көрсеткіш. Дегенмен, қол жеткізген нәтижемен тоқтап қалуға болмайды. Алда инфляцияны төмендету және инфрақұрылымды жаңғырту міндеттері тұр. Қазақстан болашақта сандық мемлекетке айналуы керек. Алда бізді үлкен мақсаттар күтіп тұр”, – деді Қасым-Жомарт Тоқаев.
Кездесудің соңында Президент Жапонияда жұмыс істеп жатқан қазақстандықтарға сәттілік тілеп, олардың еңбегін жоғары бағалады.
Еске салсақ, кеше Қасым-Жомарт Тоқаев Жапонияға ресми сапармен келген, Ханэда халықаралық әуежайында оны Жапонияның сыртқы істер жөніндегі мемлекеттік министрі Аяно Кунимицу қарсы алған. Сапар барысында Президент миллиардтаған долларлық келісімдерге қол қойылатынын хабарлаған.
Бүгін Мемлекет басшысы Императорлық сарайға барып, ресми сапарын император Нарухитомен кездесуден бастады. Сондай-ақ сапар бағдарламасына Токиодағы ең ірі синтоистік храм – Мэйджи Джингуға зиярат жасау кірді.
