Тоқаев БҰҰ-ға қайта оралу мүмкіндігі туралы сұраққа жауап берді
Қазақстан Президенті Қасым-Жомарт Тоқаев «Turkistan» газетіне берген сұхбатында Біріккен Ұлттар Ұйымына қайта қызметке оралу ықтималдығы және халықаралық дауларға қатысты ұстанымы жөнінде пікір білдірді. Бұл туралы dailykz хабарлайды.
Сұхбат кезінде журналист Бауыржан Бабажанұлы 2025 жылдың екінші жартысы Қазақстанның сыртқы саясаты үшін айрықша кезең болғанын атап өтті. Оның айтуынша, Мемлекет басшысы қысқа уақыт ішінде Бейжің, Вашингтон, Мәскеу, Анкара, Абу-Даби, Ташкент, Душанбе, Бішкек, Ашхабад және Токио қалаларына сапар жасаған.
Осыған байланысты журналист Тоқаевтың ірі халықаралық қақтығыстарда араағайын ретінде тартылуы мүмкін деген болжамдар айтылып жүргенін алға тартып, бұл жөнінде пікірін сұрады.
Президенттің айтуынша, жоғары деңгейдегі сыртқы саяси іс-шаралардың тығыз кестесі Қазақстанның халықаралық беделінің артқанын және халықаралық құқықтың толыққанды субъектісі ретіндегі маңызын көрсетеді.
«Шетелдік сапарлармен қатар, Астанаға Азия, Еуропа және Таяу Шығыстың ықпалды мемлекеттерінің басшылары келді. Әр келіссөздің артында экономикалық және инвестициялық ынтымақтастыққа, жаһандық деңгейдегі өзара іс-қимылға қатысты маңызды мәселелер тұр. Өткен жылы экономиканың басым салаларын дамыту үшін жалпы сомасы 70 миллиард доллардан асатын құжаттарға қол қойылды», – деді Қасым-Жомарт Тоқаев.
Мемлекет басшысы Еуразияның дәл жүрегінде орналасқан Қазақстанның қазіргі тұрақсыз кезеңде сыртқы процестерден тыс қалмауы тиіс екенін атап өтті.
«Біз халықаралық қатынастардың негізгі мәселелері бойынша өз көзқарасымызды, байыпты әрі салмақты ұстанымымызды білдіруіміз керек. Сол себепті БҰҰ Бас Ассамблеясының мерейтойлық сессиясында осы әмбебап жаһандық ұйымды реформалау жөніндегі Қазақстанның позициясын егжей-тегжейлі таныстырдым.
Менің халықаралық дауларда делдал болуға да, кейбір елдердің ұсыныстарына қарамастан БҰҰ-ға қайта оралуға да ниетім жоқ. Алайда жабық консультациялар мен пікірталастарға қатысамын, өйткені бірқатар мемлекет басшылары менің пікіріме қызығушылық танытады. Бұл жұмысты бұқаралық ақпарат құралдарында жариялаудың қажеті жоқ деп санаймын, популизмнен алыс адаммын. Көріп отырғанымдай, бейресми кеңестерге қатысушылар үшін де бұл маңызды», – деп түйіндеді Президент.
