Тоқаев Ұлттық қорғаныс университетінің жаңа басшысын тағайындады
Мемлекет басшысының өкімімен Бауыржан Абжанов Қазақстан Республикасының Ұлттық қорғаныс университетінің бастығы болып тағайындалды. Бұл туралы dailykz Ақордаға сілтеме жасап хабарлады.
Ақорданың мәліметінше, тиісті өкімге Қазақстан Президенті Қасым-Жомарт Тоқаев қол қойған. Бұған дейін Бауыржан Абжанов ҚР Ұлттық ұланы бас қолбасшысының орынбасары қызметін атқарған.
Ұлттық ұланның ресми деректеріне сәйкес, Бауыржан Абжанов 1968 жылғы 10 сәуірде бұрынғы Көкшетау (қазіргі Ақмола) облысы, Еңбекшілдер ауданына қарасты Мәдениет ауылында дүниеге келген.
Сізде шағым бар ма? Бізге жазыңыз
Ол 1990 жылы КСРО ІІМ-нің Новосибирск жоғары әскери командалық училищесін тәмамдаған.
1998 жылы М.В. Фрунзе атындағы Әскери академияны үздік бітірсе, 2013 жылы Мәскеу қаласындағы Ресей Федерациясы Қарулы күштері Бас штабының Әскери академиясын да үздік аяқтаған.
1990–2012 жылдар аралығында ҚР ІІМ Ішкі әскерлерінде взвод командирінен бастап, әскери құраманың командиріне дейінгі түрлі лауазымдарда қызмет атқарды. Сондай-ақ 1988–1989 жылдары Закавказье республикаларындағы ұлтаралық қақтығыстарды реттеу жұмыстарына қатысқан.
2012–2013 жылдары Ресей Федерациясы Қарулы күштері Бас штабы Әскери академиясының тыңдаушысы болды.
2013–2014 жылдары ҚР ІІМ Ішкі әскерлерінің «Шығыс» өңірлік қолбасшылығын басқарды.
2014–2016 жылдары осы өңірлік қолбасшылықты ҚР Ұлттық ұланы құрамында басқарды.
2016–2018 жылдары Ұлттық ұлан Бас қолбасшылығы Әскери кеңесінің хатшысы, кейін инспекторлық-талдамалық басқарма бастығы қызметтерін атқарды.
2018–2022 жылдары Петропавл қаласындағы ҚР Ұлттық ұланы академиясының бастығы болды.
2022 жылғы 14 шілдеден бастап ҚР Ұлттық ұланы Бас қолбасшысының орынбасары қызметін атқарып келді.
Бауыржан Абжанов – ІІМ-нің еңбек сіңірген қызметкері, КСРО мен Қазақстан Республикасының 27 медалімен марапатталған. 2011 жылғы 5 мамырда Қазақстан Президентінің жарлығымен оған генерал-майор әскери атағы берілді. Сонымен қатар ол философия докторы (PhD), Қазақстан Әскери ғылымдар академиясының профессоры.
Ұлттық қорғаныс университетінің жаңа басшысын тағайындау – елдің әскери білім беру жүйесін одан әрі дамытуға бағытталған маңызды кадрлық шешім ретінде бағалануда.
