Жәнібек Әлімханұлы чемпиондық жекпе-жекті жариялады
Қазақстандық боксшы Жәнібек Әлімханұлы чемпиондық белбеу үшін өтетін келесі жекпе-жегі туралы мәлімдеді. Спортшы бұл кездесу желтоқсан айында өтетінін айтты, деп хабарлайды dailykz.
Боксшы өзінің Instagram парақшасында желтоқсанда World Boxing Organization нұсқасы бойынша чемпиондық атағын қорғайтынын жазды.
«Qazaq Style» қазір World Boxing Organization бойынша әлем чемпионы. Желтоқсанда титулымызды қорғаймыз», – деп жазды Жәнібек Әлімханұлы.
Сізде шағым бар ма? Бізге жазыңыз
Еске салайық, 6 желтоқсанда үш бірдей чемпиондық белбеу үшін жоспарланған жекпе-жек алдында қазақстандық боксшы допингке байланысты дау ортасында қалған болатын. Кейін World Boxing Organization ресми түрде Әлімханұлының допинг-тесті оң нәтиже көрсеткенін растады және бұл іске қатысты тексеру басталды.
19 қаңтарда осы допинг ісі бойынша екінші тыңдау өтті. Кейіннен алынған сынамада тыйым салынған заттың бар екені расталғаны белгілі болды.
11 наурыз күні International Boxing Federation қазақстандық боксшыны орта салмақтағы әлем чемпионы атағынан айырды. Осы шешімнен кейін Жәнібек Әлімханұлы халықаралық ұйымның шешіміне қатысты өз пікірін білдірді.
Айта кету керек, ақпан айындағы рейтинг бойынша World Boxing Organization қазақстандық спортшыны әлі де ұйым чемпионы ретінде көрсетіп отыр. Бұған дейін ұйым оның чемпиондық белбеуін сақтап қалғанымен, боксшыны бір жылға дисквалификациялағаны туралы ақпарат тараған еді.
