Жәнібек Әлімханұлымен байланысты допинг-скандалға ресми түсініктеме берілді
Қазақстанда танымал боксшы Жәнібек Әлімханұлымен байланысты допинг-скандалға қатысты Туризм және спорт министрлігі пікір білдірді. Ведомство басшысы Ербол Мырзабосынов Үкіметтегі брифинг барысында спортшының жарыстарға қатысу мүмкіндігіне қатысты жағдайды түсіндірді. Бұл туралы dailykz тілшісі хабарлайды.
Журналистер желтоқсан айының басында қазақстандық боксшының қанынан мельдоний табылып, соның салдарынан жекпе-жек тоқтатылғанын еске салды. Осыған байланысты тергеу нәтижесі мен спортшының болашақтағы жарыстарға қатысуы туралы сұрақ қойылды.
Ербол Мырзабосыновтың айтуынша, қазіргі таңда шешуші кезең алда тұр.
«Иә, өкінішке қарай, маңызды жекпе-жек қарсаңында осындай жағдай болды. Қаңтардың 8-і күні екінші сынама ашылады. Жәнібектің командасы да, біз де осы нәтижені күтіп отырмыз. Қорытынды шыққан соң қосымша ақпарат беріледі», — деді министр.
Сондай-ақ брифингте екінші сынама оң нәтиже көрсетсе, спортшы чемпиондық атақтарынан айырылуы мүмкін бе деген сұрақ қойылды.
Министр бұл шешімді халықаралық ұйымдар қабылдайтынын атап өтті.
«Мұндай жағдайда түпкілікті шешімді Дүниежүзілік антидопинг агенттігі (WADA) мен халықаралық бокс ұйымы шығарады», — деп түйіндеді Ербол Мырзабосынов.
Еске салайық, 6 желтоқсанда Жәнібек Әлімханұлы кубалық боксшы Эрисланди Лараға қарсы үш бірдей чемпиондық белбеу үшін жұдырықтасуы тиіс болған. Алайда оң допинг сынамасына байланысты жекпе-жек өтпей қалды.
Соған қарамастан, WBO жаңартылған рейтингінде Жәнібек Әлімханұлы әзірге чемпион ретінде тіркеліп тұр.
Жәнібек Әлімханұлымен байланысты допинг-скандал — спорттағы әділдік пен жауапкершілік мәселесін қайта күн тәртібіне шығарған маңызды оқиға.
