Қазақстан мен Қытай арасындағы әуе қатынасы кеңейеді: Астана мен Шанхай арасында тікелей рейс ашылуы мүмкін
Қазақстан мен Қытай азаматтық авиация саласындағы ынтымақтастықты тереңдету жолдарын қарастыруда. Бейжіңде өткен келіссөздер барысында екі елдің әуе тасымалдаушылары үшін апталық рейстер санын 124-тен 152-ге дейін арттыру туралы уағдаластыққа қол жеткізілді. Бұл шешім жолаушылар тасымалының көлемін ұлғайтып, екі ел арасындағы байланысты нығайта түспек.
Сонымен қатар, Қытайдың Қазақстанмен әуе қатынасын жүзеге асыратын қалаларының тізімі 11-ге дейін кеңейтілді. Бұл тізімге Қытайдың ірі көлік-логистикалық және өнеркәсіптік орталықтарының бірі саналатын Чунцин қаласы да қосылды. Бұл жаңа бағыттардың ашылуы сауда-экономикалық және туристік байланыстарды дамытуға зор үлес қосады деп күтілуде.
Келіссөздердің басты тақырыптарының бірі – Астана мен Шанхай арасында тікелей әуе қатынасын ашу мәселесі болды. Бұған қоса, Қазақстан мен Қытай арасында үшінші халықаралық әуе дәлізін іске қосу мүмкіндігі де талқыланды. Бұл шаралар әуе кеңістігінің тиімді пайдаланылуын қамтамасыз етіп, ұшу бағыттарын оңтайландыруға және қолданыстағы әуе трассаларындағы жүктемені азайтуға ықпал етеді.
Кездесуде қазақстандық әуе компанияларына Қытай әуежайларынан ұшуға арналған орындар (слоттар) бөлу, Қытай әуе кеңістігін пайдалану және авиациялық іздестіру-құтқару жұмыстарындағы ведомствоаралық ынтымақтастық туралы келісім жасау мәселелері де қаралды. Тараптар азаматтық авиация саласындағы өзара іс-қимылды одан әрі дамытуға деген ұмтылыстарын растап, бірлескен жұмысты жалғастыруға келісті.
Бұл жаңалықтар Қазақстанның халықаралық әуе қатынастарын кеңейту бағытындағы белсенді жұмысының бір бөлігі болып табылады. Бұған дейін FlyArystan компаниясының Қытай мен Қырғызстанға жаңа бағыттар ашқаны, сондай-ақ Астанадан Токиоға тікелей рейс ашу мүмкіндігінің талқыланғаны туралы хабарланған болатын. Сонымен қатар, FlyArystan Атыраудан Батумиге де жаңа бағыт ашады.
Дереккөз: Kapital.kz
