Қазақстанда 168 компания суды қайта пайдалану жоспарын бекітті
Еліміздегі өнеркәсіп және жылу энергиясын өндіретін кәсіпорындар бес жылдық мерзімге суды қайта пайдалану және айналымға түсіру жоспарларын әзірлеуге міндетті. Бұл туралы Су ресурстары және ирригация министрлігінің баспасөз қызметі хабарлады. Қазіргі таңда мұндай 168 жоспар әзірленіп, бекітілді. Бұл шаралар су ресурстарын тиімді пайдалануға және олардың тапшылығын азайтуға бағытталған.
Аталған талап Су кодексінде нақты көрсетілген. Министрлік мамандары кәсіпорындар мен жылу энергиясын өндіруші субъектілерді тексеріп, инвентаризация жүргізді. Егер кәсіпорындар суды қайта пайдалану және айналымға түсіру жоспарларын орындамаса, олардың су пайдалану көлемін қысқартуды көздейтін нормативтік-құқықтық актілер қосымша әзірленуде. Бұл суды үнемдеуге және оның ластануын азайтуға ықпал етеді.
«Барлық өнеркәсіп және жылу энергиясын өндіруші кәсіпорындар бұл жоспарларды міндетті түрде әзірлеуі тиіс. Келесі жылдан бастап бұл құжаттар арнайы су пайдалануға рұқсат алу үшін міндетті болады. Бұл шаралар Су ресурстарын басқару жүйесін дамыту тұжырымдамасының мақсатты индикаторларына сәйкес, өнеркәсіпте суды қайта пайдалану үлесін 28%-ға дейін арттыруға мүмкіндік береді», — деді ҚР СРИМ Су саясаты департаментінің директоры Серікжан Бекетаев.
Ведомство мәліметінше, Қазақстанда жыл сайын шамамен 25 млрд текше метр су пайдаланылады. Оның шамамен 25%-ы өнеркәсіп мұқтаждықтарына келеді. Бұған дейін Министр Нұрлан Нұржігітов оңтүстік өңірлердегі фермерлер су тапшылығына тап болуы мүмкін екенін хабарлаған болатын. Сондай-ақ, су ұрлығымен күрес үшін республикалық жұмыс тобы құрылады және оңтүстік өңірлердегі фермерлер үшін су пайдалану лимиті белгіленді.
Дереккөз: Kapital.kz
