Қазақстанның корпоративтік секторында 15 жылда 1,3 млн жұмысшы көбейді
Еуразиялық даму банкінің (ЕАДБ) жылдық жиыны мен бизнес-форумы аясында Еуразиялық қорды тұрақтандыру және дамыту қорының (ЕҚТДҚ) сарапшылары Армения, Қазақстан, Қырғызстан және Тәжікстан еңбек нарықтарының дамуына қатысты зерттеу нәтижелерін жариялады. Қордың баспасөз қызметі таратқан мәліметке сүйенсек, Қазақстандағы жұмыспен қамту құрылымында айтарлықтай өзгерістер байқалады.
Зерттеуге сәйкес, 2010 жылдан 2024 жылға дейінгі аралықта еліміздің корпоративтік секторындағы жұмыспен қамтылғандар саны 1,3 миллионнан астам адамға артқан. Бұл ретте, өзін-өзі жұмыспен қамтығандардың саны шамамен 505 мың адамға азайған. Бұл көрсеткіштер экономикадағы корпоративтік сектордың белсенді дамып, жеке кәсіпкерліктің азая бастағанын көрсетеді.
ЕҚТДҚ сарапшыларының айтуынша, Қазақстанның жұмыспен қамту құрылымындағы бұл өзгерістерді нарықтың дамуымен байланыстыруға болады. «Біз экономиканың корпоративтік сегментінің өсімін және өзін-өзі жұмыспен қамтудың азаюын байқап отырмыз. Сонымен қатар, еңбек өнімділігінің тұрақты өсуін қамтамасыз ете алатын жоғары өнімді жұмыс орындарын құру – негізгі міндет болып қала береді», – деп атап өтті сарапшылар.
Зерттеу сонымен қатар, экономика секторлары арасында жұмыс күшін қайта бөлу жалғасып жатқанын көрсетті. Соңғы 15 жылда Қазақстанда ауыл шаруашылығында жұмыспен қамтылғандардың үлесі 17 пайыздық пунктке төмендеген. Жұмысшылардың басым бөлігі қызмет көрсету саласына ауысқан. Секторлар арасындағы жұмыс күшін қайта бөлу еңбек өнімділігінің өсуіне 25 пайыздан астам үлес қосқан, бұл зерттеуге енген елдер арасындағы ең жоғары көрсеткіш болып табылады.
ЕҚТДҚ-ның толық зерттеу нұсқасы 2026 жылдың 29 қазанында Астанада өтетін Қордың халықаралық экономикалық конференциясында ұсынылады. Бұған дейін қор мамандары 2040 жылға қарай Қазақстанда жұмыс күшінің ұсынысы 2 миллионға жуық, Қырғызстанда шамамен 1 миллион, Тәжікстанда 2 миллионнан астам адамға артуы мүмкін екенін хабарлаған болатын. Бұл жағдай экономиканың ресми секторын дамытуға және жаңа жұмыс орындарын құруға деген елеулі сұранысты қалыптастырады.
Дереккөз: Kapital.kz
