Геннадий Головкин – соңғы 20 жылдың «ең көп айналып өтетін» боксшысы атанды
Қазақстандық Геннадий Головкин әлемдегі соңғы 20 жылда ең жиі айналып өтетін боксшылар рейтингінің көшін бастады. Boxingscene құрастырған топ-10 тізіміне екі қазақстандық спортшы еніп отыр, деп хабарлайды dailykz.
Рейтингке кірген екінші қазақстандық – Жәнібек Әлімханұлы. Қазіргі әлем чемпионы болса, тізімнің тоғызыншы сатысынан орын алған. Алдағы уақытта ол кубалық Эрисланди Ларамен жекпе-жек өткізіп, чемпиондық белдіктерді біріктіруді көздейді.
Тізімнің көшбасында аты аңызға айналған Геннадий Головкин тұр. Басылымның жазуынша, GGG титул қорғау жекпе-жектерін көп өткізгенімен, оның нокаут сериясы соншалықты әсерлі болғандықтан, ұйымдастырушылар көбіне тек міндетті жекпе-жектерді ғана өткізе алған. Яғни, Головкиннің шыңға шыққан кезеңінде оған қарсы танымал боксшыларды рингке шығару оңай болмаған.
Сізде шағым бар ма? Бізге жазыңыз
Сарапшылар Головкиннің өз ең мықты жылдарында үлкен әрі даулы жекпе-жектерге қол жеткізуде қиындық көргенін атап өтті.
Айта кетейік, жақында GGG өзін әлі де кәсіби боксшы екенін және Қазақстанда қоштасу жекпе-жегін өткізуді армандайтынын мәлімдеген еді. Қазіргі таңда әйгілі боксшының жасы — 43-те.
Осылайша, Головкиннің әлемдік рингтегі беделі мен қарсыластарының одан қашқақтауы оны «ең көп айналып өтетін боксшы» атандырды.
