Қазақстан Конституциясының преамбуласын өзгерту ұсынылды
Қазақстанның басты заңы – Конституцияның преамбуласын жаңарту мәселесі күн тәртібіне шықты. Мәжіліс депутаты Унзила Шапақ Конституцияға енгізілетін түзетулерді талқылау барысында негізгі заңның кіріспе бөлігін қазіргі заман талаптарына сай қайта қарауды ұсынды. Бұл туралы Конституциялық сотқа сілтеме жасап, dailykz хабарлады.
Депутат бұл бастамасын Конституциялық комиссияның алғашқы отырысында көтеріп, преамбуланы жаңарту жай ғана редакциялық түзету емес, мемлекеттің идеологиялық бағытын айқындайтын маңызды қадам екенін атап өтті. Оның пікірінше, мұндай өзгерістер ұлттық мемлекетті нығайтуға және қоғамның құндылықтық негіздерін нақтылауға бағытталуы тиіс.
Унзила Шапақтың айтуынша, Мемлекет басшысы да преамбулада ұлттық құндылықтарға сүйену қажеттігін ерекше атап өткен. Әсіресе, қазақ даласынан бастау алатын өркениеттік және мемлекеттік дәстүрлердің сабақтастығын көрсету, сондай-ақ Қазақстанның Ұлы Даладағы тарихи мемлекеттердің мұрагері екенін айқын бейнелеу маңызды.
«Сондықтан конституциялық реформа аясында ұсынылған барлық бастамаларға үстірт қарамай, терең әрі жауапкершілікпен қарау – ортақ міндетіміз», – деді комиссия мүшесі.
Конституция преамбуласы – негізгі заңның идеологиялық әрі моральдық іргетасы. Ол мемлекеттің тарихи-мәдени болмысын, ұлттық келбетін және Конституцияны қабылдаудағы түпкі мақсаттарды айқындайды. Осыған байланысты депутат преамбулада көрініс табуы тиіс бірқатар негізгі бағыттарға тоқталды.
Ең алдымен, Қазақстан біртұтас ұлт ретінде көрсетілуі керек. Бұл қағида ұлттық бірегейлікті күшейтіп, барлық қазақстандықтарды ортақ мақсат пен ортақ жауапкершілік төңірегінде біріктіреді. Сонымен қатар, мемлекеттің унитарлық сипатын, шекарасының мызғымастығын және аумақтық тұтастығын ерекше атап өту қажет. Қазіргі геосаяси жағдайда бұл ұстанымдар елдің егемендігін нығайтудың шешуші факторлары болып саналады.
Депутат сондай-ақ преамбулада «Әділетті Қазақстан» идеясы мен оның өзегі саналатын «заң мен тәртіп» қағидатын бекіту мемлекеттің және қоғамның дамуына жаңа философия қалыптастыратынын айтты.
«Бүгін Конституция туралы сөз қозғағанда, біз тек билік пен құқықтық нормаларды ғана емес, ұлттың болашақ алдындағы жауапкершілігін де ойлауымыз керек», – деді ол.
Унзила Шапақтың пікірінше, табиғатты және экологияны сақтау идеясы мемлекет пен қоғам үшін ортақ құндылыққа айналуы тиіс. Ал мәдениет – Әділетті Қазақстанның негізі, ол халықты біріктіріп, қоғамдық бірлікті нығайтады.
Оның айтуынша, мәдени және рухани құндылықтарды конституциялық деңгейде бекіту Қазақстанды тек құқықтық емес, сонымен қатар өркениеттік мемлекет ретінде танытады. Ал ғылымға, білімге, инновацияға және болашақ ұрпақ алдындағы жауапкершілікке басымдық беру Конституцияны мемлекет пен халық арасындағы қоғамдық келісімнің айқын көрінісіне айналдырады.
Қазақстан Конституциясының преамбуласын өзгерту ұсынылды
