Серік Сапиевтің скандалы: Қарағандыдағы спорт басқармасын кім басқармақ?
Қарағанды облысының дене шынықтыру және спорт басқармасының басшысы Серік Сапиев қызметінен кеткеннен кейін басқармаға уақытша жетекші болып кім келгені белгілі болды. Бұл қызметке Берік Досымбеков тағайындалды, деп хабарлайды dailykz.
Басылымның жазуынша, Серік Сапиевтің басқарма басшысы қызметінен кенет кетуінен кейін уақытша жетекші ретінде Берік Досымбеков бекітілді.
Берік Досымбеков тағайындалмас бұрын Қарағандыдағы дене шынықтыру және спорт секторының меңгерушісі қызметін атқарып келген және өңірдің спорт саласында көп жыл бойы жұмыс істеп келеді. Оның айтуынша, қалалық сектор мен облыстық басқарма арасында әрдайым тығыз байланыс болған, сондықтан басқарма жұмысының ерекшеліктерін жақсы біледі.
«Бұл сала мен үшін өте құнды тәжірибе болып саналады», – деп атап өтті Берік Досымбеков.
Сонымен қатар, ол қазіргі жобалар мен істерді мүмкіндігінше тез арада түсініп, басқаруға кірісетінін айтты. Журналистерге ол алдағы уақытта белсенді түрде жұмыс істейтінін уәде етті.
Еске сала кетейік, бұған дейін Серік Сапиев пен оның орынбасары Даурен Есімханов Қарағанды облысы дене шынықтыру және спорт басқармасынан босатылғаны белгілі болған еді.
Сапиев одан кейін ҚР Туризм және спорт министрінің штаттан тыс кеңесшісі – жазғы XX Азия ойындарына дайындық штабының спорттық блогын үйлестіруші ретінде тағайындалды.
Сондай-ақ, біз қызметтік тексерістің нәтижелері туралы да хабарлаған болатынбыз.
