Қазақстан мен Сербия бірқатар бірлескен құжаттарға қол қойды
Қазақстан мен Сербия арасындағы екіжақты байланыстар нығая түсті. Келіссөздер қорытындысы бойынша Қазақстан Президенті Қасым-Жомарт Тоқаев пен Сербия Президенті Александр Вучич Бірлескен мәлімдеме қабылдады. Бұл туралы dailykz сайты Ақорда деректеріне сілтеме жасап хабарлады.
Президенттің баспасөз қызметінің мәліметінше, мемлекет басшыларының қатысуымен ведомствоаралық маңызды құжаттармен алмасу рәсімі өтті.
Қол қойылған меморандумдар тізімі
Атап айтқанда, келесі бағыттар бойынша ынтымақтастықты көздейтін құжаттар қабылданды:
Сізде шағым бар ма? Бізге жазыңыз
- Қазақстан Республикасы Денсаулық сақтау министрлігі мен Сербия Республикасы Денсаулық сақтау министрлігі арасындағы денсаулық сақтау саласындағы ынтымақтастық туралы меморандум;
- Қазақстан Республикасының Бас прокуратурасы мен Сербия Республикасының Әділет министрлігі арасындағы әріптестік және ынтымақтастық жөніндегі меморандум;
- Қазақстан Республикасының Жасанды интеллект және цифрлық даму министрлігі мен Сербия Республикасының Ақпарат және телекоммуникациялар министрлігі арасындағы өзара түсіністік туралы меморандум;
- Цифрландыру және электрондық үкіметті дамыту саласындағы ынтымақтастық жөніндегі меморандум;
- Ветеринария саласындағы ынтымақтастық туралы өзара түсіністік меморандумы;
- Ғылым және жоғары білім, ғылыми-технологиялық даму мен инновациялар саласындағы ынтымақтастық жөніндегі меморандум;
- Кино саласындағы өзара ынтымақтастық туралы меморандум;
- Материалдық емес мәдени мұраны қорғау бағытындағы ынтымақтастық туралы меморандум;
- «KAZAKH INVEST» ұлттық компаниясы мен Сербияның даму агенттігі арасындағы өзара түсіністік туралы меморандум;
- Қазақстан Республикасы Президенті жанындағы Мемлекеттік басқару академиясы мен Сербияның Дипломатиялық академиясы арасындағы ынтымақтастық туралы меморандум.
Ресми сапар аясындағы кездесулер
Еске сала кетейік, кеше Сербия Президенті Александр Вучич Қасым-Жомарт Тоқаевтың шақыруымен Қазақстанға ресми сапармен келген болатын. Бүгін елордада мәртебелі қонақты салтанатты қарсы алу рәсімі өтті. Бұдан кейін мемлекет басшыларының тар форматтағы және екі елдің ресми делегациялары қатысқан кеңейтілген келіссөздері ұйымдастырылды.
Жоғары мемлекеттік награда табысталды
Сапар барысында Қасым-Жомарт Тоқаев Сербия Президентіне Қазақстан Республикасының ең жоғары мемлекеттік наградасы – «Алтын Қыран» орденін табыс етті.
