Құрылтайға жаңа есімдер келуі тиіс: Мәулен Әшімбаев болашақ депутаттық құрам туралы
Еліміздің саяси өміріндегі маңызды өзгерістердің бірі – жаңа Құрылтайдың жасақталуы. Бұл тек институционалдық реформа ғана емес, сонымен қатар саясатқа жаңа буын басқарушылардың келуіне жол ашуы тиіс. Сенат төрағасы Мәулен Әшімбаев журналистермен кездесуде жоғары өкілді органның болашақ құрамына қатысты өз ойын білдіріп, оның жаңа тұлғалармен толығуының маңыздылығын атап өтті. Оның айтуынша, қазіргі қарқынды кезеңде қоғамның әртүрлі санаттарының мүддесін білдіре алатын, Құрылтай жұмысына жаңа серпін беретін кадрлар қажет.
«Менің терең сенімім – жаңа адамдар келуі керек. Қазіргі кезең өте қарқынды. Сондықтан Құрылтай құрамында жаңа тұлғалар, болашағынан үміт күттіретін саясаткерлер, жастар, әйелдер мен өңір өкілдері көбірек болса, бұл еліміз үшін өте маңызды әрі пайдалы болады деп есептеймін», – деді Мәулен Әшімбаев. Спикер бұл пікірін қазіргі депутаттардың қызметіне берілген баға ретінде емес, керісінше, саяси жүйенің заңды жаңаруы және мемлекеттік шешімдер қабылдау процесіне азаматтарды кеңінен тартуға мүмкіндік беретін қадам ретінде түсіндірді. Ол мемлекеттік басқару жүйесіне көбірек адамның тартылып, жоғары өкілді органда жұмыс істеп, қажетті заңдарды қабылдауға атсалысуы керектігін баса айтты.
Сонымен қатар, Сенат төрағасы Сенат қызметі аяқталғаннан кейін аппарат қызметкерлерін қысқарту жоспарланбағанын хабарлады. Оның айтуынша, аппарат қызметкерлерінің жинақталған кәсіби тәжірибесі сақталады. Олар Құрылтай мен «Халық кеңесі» аппараттарында жұмысын жалғастырады. «Біздің аппарат қызметкерлері Құрылтай аппаратының құрамына қосылады, ал бір бөлігі «Халық кеңесі» аппаратына ауысады. Сондықтан біз мамандардан айырылмаймыз. Бұл – менің қағидатты ұстанымым. Осы тұрғыдан алғанда олар әлеуметтік тұрғыда қорғалған», – деп түйіндеді ол.
Айта кетейік, Қазақстан Сенаты өз тарихындағы соңғы отырысын өткізді. Бұған дейін Құрылтай құрамында депутаттық әдеп жөніндегі кеңес құрылатыны хабарланған болатын. Бұл жаңа саяси және парламенттік мәдениетті қалыптастыруға ықпал етеді. Парламент «Қазақстан Республикасының Құрылтайы және оның депутаттарының мәртебесі туралы» конституциялық заң жобасын бірінші оқылымда мақұлдады. Мемлекет басшысы Қасым-Жомарт Тоқаев Құрылтай депутаттарының сайлауы тамыз айында өтетінін мәлімдеген болатын. 2026 жылғы 15 наурызда өткен жалпыреспубликалық референдумда Қазақстанның жаңа Конституциясы қабылданды. Жаңартылған Негізгі заң 1 шілдеден бастап ресми түрде күшіне енеді. Оған сәйкес Қазақстан Парламенті бір палаталы болады. Оның құрамынан Сенат шығарылып, жаңа заң шығарушы орган Құрылтай деп аталады. Сонымен қатар «Халық кеңесі» құрылады. Халық кеңесінің құрамына 126 адам енеді.
Дереккөз: Kapital.kz
