Шетел инвесторлары кеңесінің құрамы жаңартылды
Қазақстан Республикасы Президентінің жанындағы Шетел инвесторлары кеңесінің персональды құрамы жаңа мүшелермен толықтырылды. Бұл туралы ҚР Сыртқы істер министрлігінің баспасөз қызметіне сілтеме жасап, Kapital.kz іскерлік ақпарат орталығы хабарлады. Қазақстан Республикасы Президентінің 2026 жылғы 1 шілдедегі №306 өкімімен, 2024 жылғы 1 қазаннан бастап бекітілген Кеңестің персональды құрамы жаңа редакцияда жарияланды.
Жаңартылған Кеңес құрамына шетелдік тараптан жаңа қатысушылар қосылды. Бұрын байқаушы ретінде Кеңес жұмысына қатысқан «Alstom» компаниясының Африка, Таяу Шығыс және Орталық Азия аймақтары бойынша президенті Мартан Вожур енді толыққанды мүше болды. Сонымен қатар, «Power International Holding» компаниясының басшысы Мутаз Аль-Хаят та Кеңес жұмысына мүше ретінде қосылды. Ал «Presight AI Holding PLC» басқарма төрағасы Томас Прамотедхам және Ислам даму банкінің президенті Мухаммад Сулейман Аль-Джассер Кеңес мүшелерінің байқаушы статусын алды.
Қазақстандық тараптан да өзгерістер орын алды. Кеңес құрамына Қазақстан Республикасы Президенті Әкімшілігі басшысының орынбасары Әсел Жанасова, Қазақстан Республикасы Президентінің экономикалық мәселелер жөніндегі көмекшісі Нұрлан Байбазаров, Қазақстан Республикасының Көлік министрі Нұрлан Сауранбаев, сондай-ақ Қазақстан Республикасы Сыртқы істер министрлігі Инвестициялар комитетінің төрағасы Ардақ Зебешев енгізілді.
Шетел инвесторлары кеңесі – Қазақстан Республикасының Президенті төрағалық ететін, мемлекет пен халықаралық бизнес қауымдастығы арасындағы тікелей диалогты жүзеге асыратын кеңесші-консультативті орган. Дәстүр бойынша, оның жұмысына әлемдегі ірі компаниялардың басшылары қатысады. Бүгінгі таңда Кеңес құрамында 34 жетекші халықаралық компания мен ұйымның басшылары, сондай-ақ 8 байқаушы статусындағы басшы бар. Айта кетейік, шілде айында Астанада Кеңестің 38-ші отырысы өтіп, онда Қасым-Жомарт Тоқаев инвестициялық ынтымақтастықтың ең перспективалы бағыттарын атап көрсеткен болатын.
Дереккөз: Kapital.kz
