«Әділет» партиясы Құрылтай сайлауына 186 кандидат ұсынды
«Әділет» саяси партиясы Астанада өткен кезекті съезде алдағы Құрылтай сайлауына қатысатын 186 кандидаттан тұратын тізімін бекітті. Бұл партия биыл маусым айының ортасында бұрынғы «Amanat» партиясының негізінде құрылған болатын. Съезд барысында партияның басшысы, бұрынғы президент әкімшілігінің жетекшісі қызметін атқарған Айбек Дадебай мен президент әкімшілігі басшысының бірінші орынбасары Ерлан Карин кандидат ретінде ұсынылды.
Кандидаттар қатарында бұрынғы Парламент депутаттары, «Қазақтелеком» ұлттық компаниясының басшысы Бағдат Мусин, белгілі қазақстандық кәсіпкер, Qarmet және «Allur Group» компаниялар тобының директорлар кеңесінің төрағасы Андрей Лаврентьев, Президенттің телерадио кешенінің басшысы Раушан Қажыбаева, президент әкімшілігі жетекшісінің хатшылығын басқаратын Қаныш Төлеушин, Қазақстандағы балалар құқығы жөніндегі уәкіл Динара Зәкиева, Жоғары аудиторлық палатаның бұрынғы басшысы Наталья Годунова сынды тұлғалар бар. Сонымен қатар, тізімде журналистер, саясаттанушылар, қоғам қайраткерлері және кәсіпкерлер де кездеседі.
Айта кетейік, Қазақстанда 23 тамызға тағайындалған Құрылтай сайлауы алғаш рет өткелі отыр. Бұған дейін екі палаталы Парламент жұмыс істеген болатын. Жаңадан құрылған бір палаталы Құрылтай 145 депутаттан тұрады. Депутаттар партиялық тізімдер бойынша пропорционалды өкілдік жүйесі негізінде, жалпыұлттық бірыңғай сайлау округінде сайланады. Партиялардың Құрылтайда орын алуы үшін сайлауда 5 пайыздық межеден өтуі қажет. Бұған дейін «Respublica», «Ақ Жол», «Ауыл», Қазақстанның Халық партиясы, Жалпыұлттық социал-демократиялық партия (ЖСДП) және «Байтақ» жасылдар партиясы да өз кандидаттарын ұсынғандарын хабарлаған болатын.
Қазіргі таңда Қазақстанда «Әділет», «Ақ Жол», Қазақстанның Халық партиясы, «Ауыл», ЖСДП, «Байтақ» және «Respublica» партиялары тіркелген. Еске сала кетейік, 2026 жылғы 15 наурызда өткен республикалық референдумда жаңа Конституция қабылданып, 1 шілдеден бастап күшіне енді. Жаңа заңнамаға сәйкес, Сенат жойылып, бір палаталы Құрылтай құрылады. Сондай-ақ, 126 адамнан тұратын Халық Кеңесі де құрылатын болады.
Дереккөз: Kapital.kz
