Теңге неге нығайды? Ұлттық банк төрағасы факторларды атады
Биылғы жылдың бірінші жартыжылдығында ұлттық валютамыз – теңге АҚШ долларына қатысты 5,1%-ға нығайып, ел экономикасы үшін оң серпін берді. Бұл жетістікке бірқатар ішкі және сыртқы экономикалық факторлардың үйлесімді әсері себеп болды. Бұл туралы үкімет отырысы барысында Ұлттық банк төрағасы Тимур Сүлейменов мәлімдеп, теңгенің нығаюына ықпал еткен негізгі себептерге тоқталды. Сондай-ақ, ол еліміздің халықаралық резервтерінің, Ұлттық қордың, зейнетақы жинақтарының және депозиттердің қазіргі жағдайы туралы толық ақпарат берді.
Ұлттық банк басшысының айтуынша, теңгенің нығаюына бірнеше маңызды факторлар әсер еткен. Олардың қатарында қалыпты қатаң ақша-кредит саясатының жүргізілуі, бейрезиденттер тарапынан Қазақстанның мемлекеттік бағалы қағаздарына деген жоғары сұраныстың артуы, сондай-ақ үкімет пен Ұлттық банктің инфляцияны төмендету бағытында бірлесіп атқарған шаралары бар. Бұған қоса, сыртқы экономикалық ахуалдың қолайлы болуы да теңгенің нығаюына оң ықпал етті.
Тимур Сүлейменов маусым айының соңындағы жағдай бойынша елдің жалпы халықаралық резервтерінің 127 миллиард долларға жеткенін хабарлады. Бұл соманың ішінде алтын-валюта резервтері 62 миллиард доллардан асса, Ұлттық қордың активтері 2%-ға өсіп, 65 миллиард доллардан асқан. Алты ай ішінде Ұлттық қорға 1,9 триллион теңге түсіп, дәл осындай көлемдегі қаражат республикалық бюджетке трансферт ретінде бағытталды. Қордың инвестициялық табысы 2,9% немесе 1,9 миллиард долларды құрады. Бұдан бөлек, Бірыңғай жинақтаушы зейнетақы қорының активтері 6,7%-ға ұлғайып, 26,8 триллион теңгеге жеткен. Бұл кезеңде қордың инвестициялық табысы 1,1 триллион теңгені, ал зейнетақы жарналары 1,5 триллион теңгені құрады. Қазақстандықтар зейнетақы жинақтарынан мерзімінен бұрын 404 миллиард теңге алды.
Жалпы, алғашқы алты айдағы көрсеткіштер теңгенің тұрақтылығы мен ел экономикасының дамуына оңды әсерін көрсетті. Ұлттық банк жүргізіп отырған саясаттың тиімділігі мен сыртқы факторлардың оң динамикасы ұлттық валютаның нығаюына жол ашты. Бұл жағдай инфляцияны тежеуге және халықтың сенімін арттыруға ықпал етеді деп күтілуде.
Дереккөз: Kapital.kz
