Алматы-Қаскелен тас жолы сегіз жолақты болады
Мемлекет басшысы Қасым-Жомарт Тоқаевтың тапсырмасын орындау барысында Премьер-министр Олжас Бектенов Алматы мен оған жақын елді мекендер тұрғындарының Алматы-Қаскелен тас жолының қатты жүктемесіне қатысты шағымдарын назарға алды. Президент аталған жобаны кеңейту жұмыстарын дереу бастауды тапсырды. Олжас Бектенов мердігерге осы аптаның соңына дейін техника мен жұмысшыларды жұмылдырып, 20 шілдеде құрылыс жұмыстарын бастауды міндеттеді. Мемлекет басшысының тапсырмасы сапалы әрі мүмкіндігінше қысқа мерзімде орындалуы тиіс.
Үкімет басшысы жоба құны бекітілгенін және оның қымбаттамайтынын атап өтті. Жобаны жүзеге асыру үшін сатып алынатын жер учаскелеріндегі спекуляцияның алдын алу мақсатында, олардың құны 14 шілдедегі жағдай бойынша бекітілуі керек. Көлік министрі Нұрлан Сауранбаев Алматыдан Қаскелен қаласына дейінгі 8 шақырым жол учаскесін сегіз жолақты етіп кеңейту жобасын таныстырды. Қаржыландыру Қазақстан Даму Банкі арқылы жүзеге асырылады. Жоба аясында екі жолайрық пен 9 жаяу жүргінші өткелі салынады. Нәтижесінде, бұл учаскеде көлік өткізу қабілеті 2 есе артады. Құрылыс жұмыстарын аяқтап, пайдалануға беру 2027 жылдың желтоқсанына жоспарланған.
Алматы қаласының әкімі Дархан Сатыбалдының мәліметінше, күніне мегаполиске 300 мың автокөлік кіреді. Ішкі көліктерді есептегенде, трафик көлемі миллионнан асады. Алматы-Қаскелен автомобиль жолы Алматы агломерациясындағы ең көп жүктелетін учаскелердің бірі болып табылады. Мұндағы қозғалыс қарқындылығы тәулігіне шамамен 60 мың автокөлікке жетеді. Сондай-ақ, Абай даңғылын БАКАД-қа дейін тесу жобасы туралы да баяндалды. Алматы облысының әкімі Марат Сұлтанғазиев Ұзынағаш ауылынан 32 шақырым балама жол құрылысының басталғаны туралы хабарлады. Бұл жоба Алматы-Қаскелен тас жолындағы жүктемені азайтуға мүмкіндік береді.
Аталған жобалар бойынша Алматы мен Алматы облысында жер мәселелерін шешу аяқталу сатысында. Сонымен қатар, Алматы агломерациясын дамыту шаралары талқыланды. Алматы-Есік, Алматы-Талғар бағыттарындағы жол жобалары қаралды. Рельсті көлік және Алматы метрополитенін дамыту жұмыстары да жүргізілуде. Үкімет басшысы Алматы агломерациясының көлік байланысын кешенді шешу бойынша бірқатар тапсырма берді.
Дереккөз: Kapital.kz
