Абай облысында 1,5 миллиард долларлық индустриялық парк салынады
Абай облысының әкімі Берік Уәли Бейжіңде шетелдік инвесторлармен бірқатар кездесулер өткізіп, жалпы сомасы 2,5 миллиард долларға меморандумдарға қол қойды. Атап айтқанда, халықаралық инжиниринг және инвестициялық компания DDS Group өкілдерімен бірлескен жоба талқыланды. Бұл компания өнеркәсіпті жаңғырту, инфрақұрылым құрылысы және индустриялық парктерді дамытуға маманданған. Абай облысы әкімдігінің баспасөз қызметінің хабарлауынша, DDS Group индустриялық парктер, көлік инфрақұрылымы, тұрғын үй және өндірістік нысандар құрылысында мол халықаралық тәжірибеге ие.
Кездесу қорытындысы бойынша облыс әкімі Берік Уәли мен DDS Group компаниясының директоры Хуа Дунъи өзара түсіністік және ынтымақтастық туралы меморандумға қол қойды. Компания Мақаншы ауданындағы Бахты ауылында жалпы ауданы 3000 гектар болатын индустриялық парктің құрылысын бастауды жоспарлап отыр. Жоба құны 1,5 миллиард АҚШ долларын құрайды. Бұл жоба өңірдің экономикалық дамуына айтарлықтай серпін береді деп күтілуде.
Бұдан бөлек, өңір басшысы Қытайдың жетекші өнеркәсіптік холдингтерінің бірі болып табылатын Jiachen Group басшылығымен кездесті. Аталмыш компания металлургия, тау-кен өнеркәсібі, отқа төзімді материалдар өндіру, логистика және халықаралық сауда салаларында жұмыс істейді. Кездесу нәтижесінде Абай облысы әкімдігі, Liaoning Jiachen Holding Group және Xinjiang Sanbao Industrial Group компаниялары арасында Мақаншы ауданында алюминий зауытын салу туралы меморандумға қол қойылды. Бұл жобаның құны 1 миллиард долларды құрайды. Сондай-ақ, China Railway Construction Engineering Group (CRCEG) компаниясының өкілдерімен Абай облысында инфрақұрылымдық жобаларды жүзеге асыру, көлік-логистикалық желіні дамыту және құрылыс саласындағы ынтымақтастық перспективалары талқыланды.
Естеріңізге сала кетейік, өткен жылы өңірдің жалпы өнім көлемі 3,9 трлн теңгеге жетті. Биылғы жылдың қаңтар-сәуір айларында қысқа мерзімді экономикалық көрсеткіш 103,8% құрады. Инвестициялар көлемі 19,4% өсіп, өнеркәсіп, өңдеу секторы, ауыл шаруашылығы, құрылыс және көлік салаларында оң динамика сақталды. Қазақстан Үкіметі Абай облысы аумағында арнайы экономикалық аймақ (АЭА) құру бастамасын қолдады. Оның бастапқы кезеңдегі ауданы 600 гектар, кейіннен 1000 гектарға дейін кеңейтіледі. АЭА-ның басым бағыттары ретінде агроөнеркәсіптік кешен, логистика, көлік-хабтық қызметтер және өңдеу өнеркәсібі айқындалды. Мұнда бірқатар ірі инвестициялық жобаларды жүзеге асыру жоспарлануда.
Дереккөз: Kapital.kz
