Елена Рыбакина Қазақстан паспорты – соңғы күндері Ресейде талқыланып жүрген қос азаматтық туралы қауесеттерге нақты жауап болды.
Танымал қазақстандық теннисші Елена Рыбакина жұртшылық алдына Қазақстан Республикасының паспортымен шығып, әлеуметтік желілерде қызу талқылауға себеп болды. Бұл туралы dailykz Sports.kz-ке сілтеме жасап хабарлайды.
Қытайдағы турнир және жанкүйерлермен кездесу
Басылым мәліметінше, Елена Рыбакина Қытайға ұшып барып, World Tennis Continental Cup атты көрме турниріне қатыспақ. Турнир қарсаңында спортшы жергілікті жанкүйерлермен кездесіп, сол сәттен фото және бейнематериалдар желіге тарады.
Кадрларда анық байқалатыны – Рыбакинаның қолында Қазақстан азаматының паспорты бар. Бұл жайт әлеуметтік желі қолданушылары арасында бірден назар аудартты.
Мәселенің мәні неде?
Бұған дейін Ресей теннис федерациясының президенті Шамиль Тарпищев Елена Рыбакинаның Мәскеуде тұратынын және оның Ресей азаматтығы бар екенін мәлімдеген еді. Оның айтуынша, Қазақстан азаматтығы спорттық мансап үшін рәсімделген.
Алайда бұл пікірді Қазақстан теннис федерациясы ресми түрде жоққа шығарды. Федерация өкілдері Қазақстанда қос азаматтыққа жол берілмейтінін және «спорттық азаматтық» деген ұғым заңда мүлде жоқ екенін қадап айтты.
