Қазақстанның екінші ракеткасы Австралияда жеңіспен бастады
Қазақстанның үздік ерлер теннисшілерінің бірі Александр Шевченко ATP 250 сериялы хард турнирінде Аделаидада алғашқы матчын жеңіспен бастады, деп хабарлайды dailykz.
Әлем рейтингінде 104-ші орында тұрған спортшы турнирдің негізгі сіткесіне квалификациядан өтіп шыққан. Бірінші айналымда ол әлемнің 66-шы ракеткасы, Босния теннисшісі Дамир Джумхурмен кездесті.
Ойын үш сетке созылып, Шевченконың жігерлі жеңісімен аяқталды: 4:6, 6:4, 7:5.
Теннисшілер кортта 2 сағат 27 минут өткізді. Осы уақыт ішінде қазақстандық спортшы жеті эйс жасады, бес қос қателік жіберді және он брейк-пойнттің алтауын сәтті пайдаланды.
Екінші айналымда Шевченко америкалық Итан Куинн мен венгр Мартон Фучович арасындағы матчтың жеңімпазымен ойнайтын болады.
Аделаидадағы турнир Australian Open алдында өтетін соңғы жарыс болып табылады. Маусымның алғашқы Үлкен шлем турнирінің негізгі сіткесі 18 қаңтардан басталады.
