Қазақстан құрамасы жасөспірімдер арасындағы хоккейден әлем чемпионатында Түркияны жеңді
Қазақстанның 18 жасқа дейінгі қыздардан құралған жасөспірімдер құрамасы (U18) хоккейден 2026 жылғы әлем чемпионатында (IIA дивизионы) қатарынан үшінші жеңісіне жетті. Стамбул қаласында өтіп жатқан турнирде ұлттық команда алаң иелері – Түркия құрамасын 5:1 есебімен айқын ұтты, деп хабарлайды dailykz тілшісі.
Үшінші турдағы кездесуде қазақстандық хоккейшілер ойын басынан бастап басымдық танытты. Жеңімпаздар құрамында София Муравьева дубль авторы атанып, 29 және 32-минуттарда шайба соқты. Сонымен қатар Ульяна Куклина (34), София Зубкова (42) және Рената Лившиц (53) бір-бір голдан өз еншілеріне жазды. Түркия құрамасының жалғыз шайбасын Тан Гёксал 34-минутта салды.
Осы нәтижеден кейін Қазақстан құрамасы үш матчтың барлығында жеңіске жетіп, жалпы шайбалар айырмасын 27:4 деңгейіне жеткізді. Қазір команда тоғыз ұпаймен турнир кестесінде көш бастап тұр. Жоғары дивизионға көтерілу үшін IIA дивизионында бірінші орын алу қажет.
Алда қазақстандық қыздарға тағы екі маңызды матч бар. 23 қаңтарда олар Нидерланд құрамасымен кездессе, 25 қаңтарда турнир көшбасшылығы үшін таласып отырған Оңтүстік Корея құрамасына қарсы ойнайды.
