Қазақстанда ұсталған азаматтарға олардың құқықтары мен бостандықты шектеу негіздері түсіндірілетін болады
Қазақстанда ұсталған азаматтарға олардың құқықтары мен бостандықты шектеу себептері міндетті түрде түсіндірілмек. Бұл туралы Қазақстанның жаңа Конституциясының жобасында айтылған, деп хабарлайды dailykz, Конституциялық сотқа сілтеме жасап.
Жаңа Конституция жобасының 18-бабында тергеу аясында ұсталған қазақстандықтардың негізгі құқықтары нақты бекітілген.
18-бап
1. Әрбір адамға жеке басының қол сұғылмаушылығы мен бостандығына құқық кепілдендіріледі.
2. Сот шешімінсіз адам заңда белгіленген мерзімдерден тыс қамауға алынбайды.
Қамауда ұстау тек сот шешімімен ғана жүзеге асырылады және оны шағымдану құқығы қамтамасыз етіледі.
3. Әрбір адам ұсталған сәттен бастап бостандығын шектеудің негіздері мен өз құқықтары туралы толық хабардар етілуі тиіс.
4. Ұсталған, күдікті немесе айыпталушы адам ұсталған кезден бастап, күдікті ретінде танылған сәттен не айып тағылған күннен бастап адвокаттың (қорғаушының) көмегін пайдалануға құқылы.
Ал 19-бапта өзін-өзі айыптамау құқығы бекітілген.
19-бап
1. Адам оның кінәсі заңды күшіне енген сот үкімімен дәлелденгенге дейін кінәсіз деп есептеледі.
2. Ешкім өзіне, жұбайына (зайыбына) және заңмен айқындалған жақын туыстарына қарсы куәлік беруге міндетті емес.
Сондай-ақ дін қызметкерлері өздеріне тәубе ету кезінде сырын ашқан адамдарға қарсы куәлік бермейді.
3. Бір құқық бұзушылық үшін адамды қылмыстық немесе әкімшілік жауапкершілікке қайтадан тартуға тыйым салынады.
Айта кетейік, 31 қаңтар күні Қазақстанның жаңа Конституциясының алғашқы жобасы ресми түрде жарияланды. Осы құжатта ұсталған азаматтардың құқықтарын қорғау мен бостандықты шектеудің заңдылығын қамтамасыз етуге ерекше назар аударылған.
Қазақстанда ұсталған азаматтарға олардың құқықтары мен бостандықты шектеу негіздері түсіндірілетін болады.
