Қазақстанның ең мықты фристайлшысы Олимпиада-2026 ойындарын 16-орынмен бастады
Қазақстанның ең мықты фристайлшысы Олимпиада-2026 жүлдесінен тыс қалды. Ерлер құрамасының фристайл-могулдағы көшбасшысы Павел Колмаков Италияда өтіп жатқан Олимпиада ойындарындағы алғашқы дисциплинада үздік үштікке ене алмады, деп хабарлайды dailykz тілшісі.
Бейсенбі күні 29 жастағы спортшы классикалық могул бағдарламасының финалдық кезеңінде өнер көрсетті. Өз мүмкіндігін толық пайдалануға тырысқан Колмаков бұл сында 75,70 ұпай жинап, қорытынды есепте 16-орынға тұрақтады. Алайда негізгі финалға тек сегіз үздік нәтиже көрсеткен спортшы өткендіктен, қазақстандық атлет жүлде үшін күресті жалғастыра алмады.
Италиядағы Олимпиада Павел Колмаков үшін мансабындағы төртінші Олимпиада ойындары болып отыр. Оның Олимпиададағы ең жоғары жетістігі — Пхенчхан-2018 ойындарында алған жетінші орын.
Айта кетейік, осы Олимпиадада Колмаков әлі де өнер көрсетеді. Ол олимпиадалық бағдарламаға жаңадан енгізілген параллель могул дисциплинасына қатысады. Павел Колмаков — Олимпиада-2026 ойындарында фристайл-могул бойынша Қазақстан ерлер құрамасынан қатысып жатқан жалғыз спортшы.
Ал классикалық могул сайысында жеңісті австралиялық Купер Вудс иеленді. Бұл — оның Олимпиададағы алғашқы алтын медалі. Финалдық кезеңде ол канадалық Микаэль Кингсберимен бірдей ұпай (83,71) жинағанымен, қосымша көрсеткіштер бойынша алға шықты. Кингсбери осылайша Олимпиададағы үшінші күміс медалін алды. Айта кетсек, ол Пхенчхан-2018 ойындарының чемпионы болған.
