20 жастағы қазақстандық тау шаңғышысы Олимпиада ойындарында алғаш рет өнер көрсетті
20 жастағы қазақстандық тау шаңғышысы Олимпиада ойындарында дебют жасады. Қазақстан құрамасының өкілі Александра Скороходова Италияда өтіп жатқан қысқы Олимпиада-2026 ойындарында алғаш рет жарыс жолына шықты, деп хабарлайды dailykz тілшісі.
Бейсенбі күні Олимпиада аясында супергигант дисциплинасы бойынша жүлделер сарапқа салынды. Бұл – спортшылар белгіленген қақпалардан өтіп, трассаны ең қысқа уақытта бағындыруға тырысатын жарыс түрі.
Александра Скороходова мәреге сәтті жетіп, 1 минут 31,22 секунд нәтиже көрсетті. Қорытынды хаттамада ол 25-орынға жайғасты және бір қарсыласын артта қалдырды. Айта кету керек, бұл жарыста 17 спортшы, оның ішінде бірнеше фаворит, трассаны аяқтай алмай, жарыстан шығып қалды.
Супергиганттағы жеңіс итальяндық Федерика Бриньонеге бұйырды. Ол алғаш рет Олимпиада чемпионы атанды. Күміс медальды франциялық Роман Мирадоли (+0,41 секунд) иеленсе, қола жүлде австриялық Корнелия Хюттерге (+0,52) тиді.
Бұл Олимпиада Александра Скороходова үшін алғашқы Олимпиада ойындары болып отыр. Алдағы күндері ол алып слалом және слалом дисциплиналары бойынша да өнер көрсетеді. Ал ерлер арасында Қазақстан атынан тау шаңғысы жарыстарына Ростислав Хохлов қатысады.
