ҚПЛ-дың үздік сұрмергені «Астанадан» ресейлік клубқа ауысты
Албаниялық жартылай қорғаушы Назми Грипши Ресейдің Рубин клубының құрамын толықтырды. Бұл туралы қазандық клубтың Instagram-дағы ресми мәлімдемесіне сілтеме жасап dailykz хабарлады.
28 жастағы футболшы «Рубинмен» 2028/29 маусымының соңына дейін келісімшартқа қол қойды. Жаңа командасында ол 11-нөмірмен өнер көрсетеді.
Мәміленің ресми қаржылық шарттары жарияланған жоқ. Алайда Transfermarkt порталының дерегінше, Грипшидің Астана клубынан «Рубинге» ауысуы 390 мың еуроға бағаланған. Ал ойыншының нарықтық құны шамамен 1,5 млн еуроны құрайды.
Сізде шағым бар ма? Бізге жазыңыз
Өткен маусымда Қазақстан Премьер-лигасы аясында Назми Грипши 16 гол соғып, турнирдің үздік бомбардирі атанды. Ол «Астана» сапында 2024 жылдың жазынан бері ойнады. Осы уақыт ішінде елордалық клуб үшін 53 матч өткізіп, 25 гол мен 12 нәтижелі пас авторы болды.
Бұған дейін Грипши Албанияда «Теута» және «Скендербеу» клубтарында, сондай-ақ Косовода «Балкани» командасында өнер көрсеткен. Албания ұлттық құрамасы сапында бір матчқа қатысқан — бұл ойын өткен жылдың қазан айында өткен.
ҚПЛ-дың үздік сұрмергені «Астанадан» ресейлік клубқа ауысты
