UFC-тің бұрынғы чемпионы Брэндон Морено қатарынан екінші рет жеңіліске ұшырады
Мексикалық аралас жекпе-жек шебері (ММА) Брэндон Морено Мехикода өткен UFC Fight Night 268 турнирінде жеңіліс тапты, деп хабарлайды dailykz тілшісі.
Спортшы кештің басты жекпе-жегінде октагонға шықты. Оның қарсыласы — ағылшын файтері Лонир Кавана болды. Айта кетейік, Кавана бұл кездесуде жарақат алып қалған қазақстандық **Асу Алмабаев**тың орнына шыққан.
Жекпе-жек аса жеңіл салмақ дәрежесінде (56,7 кг дейін) өтті. Бұл дивизионда Морено рейтингте алтыншы орында тұрса, Кавана 15-орында болған.
Сізде шағым бар ма? Бізге жазыңыз
Қарсыласу толық бес раундқа созылды. 26 жастағы ағылшын спортшысы төрешілердің бірауыздан шығарған шешімімен (49:46, 48:47, 48:47) жеңіске жетті. Сонымен қатар, ол «Кештің үздік өнері» номинациясы бойынша 100 мың АҚШ доллары көлемінде (қазіргі бағаммен шамамен 50 млн теңге) бонусқа ие болды.
Осылайша, Кавананың кәсіби ММА-дегі көрсеткіші — 10 жеңіс және 1 жеңіліс. Ал 32 жастағы Морено қатарынан екінші рет ұтылды. UFC-тің бұрынғы чемпионының мансабында қазір 23 жеңіс, 10 жеңіліс және 2 тең нәтиже бар.
