Су шаруашылығы саласында 975 жаңа жұмыс орны ашылады
Қазақстандағы су шаруашылығы саласын дамыту аясында 975 тұрақты және 1866 уақытша жұмыс орны ашылады. Бұл туралы Су ресурстары және ирригация министрлігінің баспасөз қызметі хабарлады. Гидротехникалық құрылыстарды салу және реконструкциялау жұмыстары өңірлерде, әсіресе ауылдық жерлерде өмір сүру деңгейін жақсартуға ықпал етеді деп күтілуде.
Су шаруашылығы саласын дамыту жаңа білікті мамандарды тартуға да жол ашады. Қазіргі таңда су мамандықтары бойынша шамамен 2,7 мың студент білім алуда. «Қазсушар» РМК филиалдарында өндірістік тәжірибеден өтетін студенттердің саны да артып келеді. Сонымен қатар, сала қызметкерлерінің жалақысын көтеру бойынша жыл сайын тиісті шаралар қабылдануда. Бұл туралы Су ресурстары және ирригация министрі Нұржан Нұржігітов мәлімдеді.
2024 жылы бекітілген Су саласын дамытудың кешенді жоспарына сәйкес, 42 жаңа су қоймасы салынып, 37 бұрынғы су қоймасы реконструкцияланады. Бұған қоса, 14,5 мың шақырым канал жаңартылады. Қазіргі уақытта үш жаңа су қоймасының құрылысы басталды. Түркістан облысында екі су қоймасының құрылысы аяқталуға жақын. 2028 жылға дейін бұл өңірде тағы төрт жаңа су қоймасын салу жоспарлануда. Тағы екі су қоймасының құрылысына қатысты жобалау құжаттары дайындалды.
Бұған қоса, 13 нысанның құрылысына құжаттар әзірленуде. Министрлік бес су қоймасын реконструкциялау жұмыстарын да аяқтады. Сегіз су қоймасын реконструкциялауға қатысты жобалау құжаттары дайындалып қойған. Алдағы уақытта тағы 18 нысан бойынша құжаттар дайындалатын болады. 2024-2025 жылдары шамамен 1,5 мың шақырым каналды реконструкциялау және жаңғырту жұмыстары аяқталды. Жыл соңына дейін 962 шақырым канал пайдалануға беріледі деп жоспарлануда. Бұл шаралар шамамен 200 мың гектар егістік алқапты сумен қамтамасыз етуді жақсартады.
Дереккөз: Kapital.kz
