«Азық-түлік корпорациясы» ЕАДБ-мен 100 млн долларлық несие желісін ашады
«Азық-түлік корпорациясы» Ұлттық компаниясы мен Еуразиялық даму банкі (ЕАДБ) арасында 100 миллион АҚШ доллары мөлшеріндегі несие желісін ашу туралы келісімге қол қойылды. Бұл қаржыландыру ұлттық оператордың өз жобаларын жүзеге асыруға, сондай-ақ фермерлерді қолдауға, басым дақылдардың өндірісін ынталандыруға және ішкі нарықта өсімдік шаруашылығы өнімдерінің тұрақты ұсынымын қалыптастыруға бағытталмақ.
«Азық-түлік корпорациясы» басқарма төрағасының бірінші орынбасары Ілдар Исмағұловтың айтуынша, тартылған несие аграрлық секторды қолдау жөніндегі ұлттық оператордың қаржылық мүмкіндіктерін кеңейтеді. Ол ЕАДБ-ға стратегиялық серіктестік үшін алғыс білдіріп, бұл шешімнің Қазақстанның ғана емес, бүкіл өңірдің азық-түлік қауіпсіздігін қамтамасыз етудегі мемлекеттік институт ретіндегі «Азық-түлік корпорациясына» деген сенімді көрсететінін атап өтті. Бұл келісім еуразиялық аймақтың халықаралық инвестициялары мен даму перспективаларына арналған бизнес-форум аясында жасалды.
ЕАДБ басқарма төрағасының орынбасары Руслан Дәленов бұл келісімнің «Азық-түлік корпорациясымен» ұзақ мерзімді ынтымақтастықтың жалғасы екенін атап өтті. Оның айтуынша, ЕАДБ үшін қатысушы елдер экономикасының орнықты дамуына, соның ішінде агроөнеркәсіп кешенін қолдау арқылы ықпал ету маңызды. Бұған дейін «Азық-түлік корпорациясы» 47,5 миллиард теңгеге 380 мың тонна астық сату туралы келісімшарттар жасасқан болатын. Астық отандық ұн тартушылар мен құс фабрикаларына, сондай-ақ экспортқа жөнелтілуде. Өткен жылы Қазақстан астық пен ұн экспортын 13,6% арттырып, шетелдік нарықтарға 11,7 млн тонна өнім (астық баламасында) жеткізді.
Дереккөз: Kapital.kz
